Ariel D. Járn delerar og fabúlerar

Þjóðstjórn

2007-05-13T06:56:00.001-07:00

Ef Frjálslyndir, Íslandshreyfingin og Vinstri Græn myndu sameinast undir merkjum Maóista og tækju upp listabókstafinn M, hvað myndi þá þjóðstjórn Framsóknar, Sjálfstæðisflokks, Samfylkingar og Maóista heita ?

Svar: BDSM

Tvöþúsundogsjö

2007-01-07T13:06:00.000-08:00

Þá er 2007 orðið að veruleika. Mér finnst magnað að það sé liðinn áratugur frá 1997.

Þetta ár byrjaði ég í menntaskóla og fór að læra á bíl. Ætli það sé ekki svona það helsta sem gerðist, fyrir utan það að það voru einhverjar hræringar í þjóðfélaginu. Ég man það ekki, ég var of upptekinn við að hlusta á fyrstu smáskífu Quarashi.

Áratugur. Árafokkingtugur. Ég ætla að fara að halda dagbók.

Var hjá Arnaldi að ræða við Grím frænda í gær. Hann talaði um að maður ritskoðaði alltaf allt sem maður segði og skrifaði. Hversu ritskoðuð eru þá bloggin? Og hvað er þau? Persónuleg skrif sem allir mega samt skoða?

Hljómar svolítið eins og flassari sem er samt alltaf í fötum.

Er nauðsynlegt að skjóta þá?

2006-10-30T08:09:00.000-08:00

Magnað hvað ég á erfitt með að fella mig við báða hópana sem takast á yfir hvalveiðunum.

Það má eiginlega segja að ég sé orðinn langreiður út af þessu öllu saman.

P.S. Ég er að springa úr hlátri núna. Virkilega að springa.

Gleðifréttir!

2006-09-28T09:13:00.000-07:00

Fékk nýlega að vita að ég hef staðist allt í London Film School og er kominn með MA gráðu í handritsskrifum. Stórskemmtileg tíðindi og ég fer út í desember til að klæða mig í skikkju og setja á mig skrýtinn hatt.

Eitt vandamál hefur hins vegar verið óleyst í marga mánuði; höfundarrétturinn á handritunum sem við skrifuðum í skólanum. Skólinn hefur dregið lappirnar hvað þetta varðar allar götur síðan ég hóf nám í fyrra og þegar útlitið var verst var skólastjórinn farinn að ýja að því að við gætum keypt hann aftur!!!

Í dag var hinsvegar staðfest að það er fyrir bí; allir nemendur fá að eiga höfundarréttinn sinn, enda væri annað frekar skrýtið.

Þetta þýðir að handritið mitt sem ég skrifaði í vetur er loksins MÍN EIGN og ég get haldið áfram að skrifa það laus við allar áhyggjur um að ég muni seinna þurfa að leysa það úr gíslingu með prósentum á ógerðri kvikmynd sem mun örugglega ekki koma til með að skila hagnaði hvort eð er.

Free at last!

P.S. Ég er ekki að kvarta.

Örninn er lentur

2006-09-05T15:50:00.000-07:00

Þá hef ég lokið ferli mínum sem flugþjónn og var seinasta flugið eftirminnilegt; leiguflug til Mallorca.

Þegar ég sá flugið á skránni minni varð mér hugsað til sjöunda áratugsins þegar Loftleiðir flugu með fulla íslendinga til og frá sólarlöndum. Þá var öldin önnur: allir með gjaldeyri í tösku, drukkið stíft fram og til baka, keðjureykt aftast í vélinni og ekkert mál að labba fram í flugstjórnarklefa til að eiga orð við flugmennina.

Flugið mitt var hins vegar ósköp venjulegt eins og við var að búast; rólegir og þægilegir farþegar, engin ölvun, ekkert reykt og flugstjórnarklefinn að sjálfsögðu harðlæstur.

Nema eitt: vélin var ekki merkt Icelandair heldur Loftleiðum.

Leiguflugin eru nefnilega gerð út í nafni gamla félagsins þannig að öfugt við allar kempurnar sem ég hef flogið með þessi tvö sumur get ég sagst hafa byrjað ferilinn hjá Icelandair og endað hann hjá Loftleiðum.

Geri aðrir betur.

P.S. Ég varð 25 ára í dag.

"Virkjum Jóa 2006"

2006-07-17T18:02:00.000-07:00

...er loksins hafið. Hlaupið var frá Smiðjustíg út í Laugartanga og til baka. Ekkert Boot Camp en mjór er mikils vísir og allur sá jazz...

Fyrir þá sem vilja styrkja málefnið: hægt að leggja fram 100 krónur með því að senda SMS í 1454 og skrifa: AFRAM JOI!

Zidane ekki söguna meir

2006-07-12T10:02:00.000-07:00

,,Þú getur fjarlægt manninn úr gettóinu en þú getur ekki fjarlægt gettóið úr manninum" sagði Thierry Henry um félaga sinn Zinedine Zidane um daginn. Við Jóhann Alfreð urðum heldur betur hissa þegar atburðir skáldsögunnar okkar sem minnst er á í færslunni hér að neðan urðu að veruleika í úrslitaleik HM á sunnudaginn.

Því set ég þennan póst nú inn til að benda á að efnistök bókarinnar líkja ekki eftir raunveruleikanum heldur öfugt ef eitthvað er.

Bók í smíðum

2006-07-05T13:16:00.000-07:00

Við félagarnir Jóhann Alfreð höfum hafist handa við að skrifa nóvellu sem fjallar um ungan dreng frá Bólivíu sem brýst úr fátækt til mikilla metorða hjá fótboltafélagi á Spáni.

En spurningin er hvort hann geti flúið erfiðan bakgrunn sinn?

Kápan er tilbúin, svo skrifar þetta sig sjálft.

Alltaf í boltanum

2006-07-05T12:46:00.000-07:00

Horfði á England - Portúgal á laugardaginn. Hjartað sló Englandsmegin og var ég ákaflega skúffaður þegar þeir töpuðu vítaspyrnukeppninni eftir að hafa barist hetjulega, margmeiddir og manni færri. Mikið er ég feginn að vera ekki í Englandi núna.

Við Arnaldur vorum svo miður okkur að við fórum niður í Hljómskálagarðinn eftir leikinn og spörkuðum í bolta. Ég klæddist að sjálfsögðu treyju Indriða Sigurðssonar, átrúnaðargoðs míns, og hljóp eins og ég ætti lífið að leysa.

Myndin er tekin eftir æsispennandi 7 mínútur.

Red Hot Chili Peppers eru saklausir

2006-06-24T20:56:00.000-07:00

Nú stendur yfir fáránlegt besserwisseringa-rifrildi á netinu um hvort lag Red Hot Chili Peppers "Dani California" sé í raun bara lagið "Last Dance with Mary Jane" eftir Tom Petty.

Svo virðist sem tveir Þórðarglaðir amatör-plötusnúðar hafi komið vitleysunni af stað með því að taka lag Petty's, spila það hraðar og bera þau tvö saman í örfáar sekúndur.

Einhvern veginn virðist það hafa gleymst hjá snillingunum að taka það fram að einungis er um er að ræða brot úr báðum lögunum, viðlögin eru gjörólík og lag RHCP hefur fleiri ólíka kafla.

Að sama skapi rista ásaknir um textatengsl grunnt; orðið Indiana birtist í báðum lögum og bæði lýsa þau sögu stúlku sem fer af beinu brautinni. Veit ekki til þess að neinn eigi einkaleyfi á því minni.

Þá ber að nefna að snillingurinn Rick Rubin útsetti bæði lögin og sá ekkert athugavert við þetta.

Þetta er klippan sem flestir nota til að bera lögin saman, en vert er að minnast á að hún er afar villandi og blandar t.d. trommum RHCP við lag Petty's í byrjuninni, og stendur sú fölsun meira að segja ansi tæpt því upphafsgítar-riff Petty's er mun afslappaðara og óreglulegra og fer á endanum úr takti. Einnig er það spilað allt of hratt.

Fyrir þá sem nenna að hlusta á virkilega vitlausa kalla bulla rosalega mikið og lengi, þá er það hægt hérna. Um er að ræða fíflin sem hófu þessa vitleysu og heyrist vel hvað hlakkar í þeim er þeir telja sig hafa gert einhverja stórkostlega uppgötvun.

Sjálfur ætla ég að vinna í að koma hér inn klippu sem ber saman viðlögin tvö, svona rétt til þess að benda á að meirihluti lagsins er ekkert líkur lagi Petty's, sem vel að merkja hefur svipaðan hljómagang og milljón önnur lög.

Mávamorð í Reykjavík

2006-06-22T16:24:00.000-07:00

Borgaryfirvöld hafa tilkynnt mörgum til hryllings að nú verði farið í herferð til að uppræta máva við Reykjavíkurtjörn.

Mér þótti Gísli Marteinn hálf furðulegur þegar ég sá hann útskýra strategíuna fyrir NFS í gær, hann minnti mig meira á marskálk en þennan mjúka og jákvæða mann sem talaði um leikskóla og fjölskylduna.

En fjölskyldusjónarmið reyndust svo vera tengingin; það verður að uppræta mávana til að börnin geti gefið öndunum brauð í friði, án þess að "hafa mávinn gargandi yfir sér sínkt og heilagt," eins og GMB komst skemmtilega að orði.

Jóhann Óli Hilmarsson, formaður Fuglaverndar, sagði þetta skelfilega hugmynd og benti á að best væri bara að hætta að gefa brauð. Flestir vita enda að öndum er enginn greiði gerður með því að fita þær á sætu brauði.

En hin krúttlega brauð-athöfn er greinilega svo hjartfólgin fjölskyldufólki að það verður að fara út í stórfellda skothríð gegn mávum til að verja hana.

Mér þykir þessi málflutningur standa á slíkum "brauðfótum" (trommusóló hér, takk) að réttast væri að rífa hann (þ.e.a.s. málflutninginn) í mola og gefa öndunum, þá væru nú jólin enda nóg til að smjatta á í því bakaríinu!

Betra væri frekar að finna milliveginn þannig að báðir hópar verði sáttir og tel ég mig hafa lausnina:

Það er ákveðin kúnst að gefa öndum brauð, og sjóaðir brauðgjafar kunna ýmislegt fyrir sér í þeim efnum. Fyrir það fyrsta er hægt að stýra andahópum nokkuð vel ef kastað er markvisst og spart. Mávarnir koma hægar og síður ef þetta er gert RÓLEGA, án þess að heilu brauðstykkjunum sé dælt ómarkvisst út um allt.

Mávarnir munu hinsvegar alltaf koma og því um að gera að láta þau safnast saman frá öndunum. Þetta má gera með því að kasta einstaka brauðbita til þeirra og þétta jafnframt þyrpinguna.

Þegar þeir eru komnir nálægt bakkanum byrjar svo fjörið, og tek ég það fram að sá sem kenndi mér þetta trix var hinn dansk-spænski vinur minn Diego Nielsen sem bjó í Reykjavík í fyrrasumar:

Maður stendur einfaldlega upp og veifar handleggjunum upp og niður í sífellu. Á augabragði forða mávarnir sér allir sem einn, en endurnar eru eftir. Ránfuglar hræðast ekkert nema stærri ránfugla.

Þetta krefst reyndar talsverðar æfingar og er skiljanlegt að börn séu sein til að skilja bæði teórískar og praktískar hliðar brauðgjafar.

Því finnst mér að borgaryfirvöld ættu frekar að prenta bækling þar sem þessar aðferðir eru kenndar og dreifa honum til allra borgarbúa, auk þess sem hægt væri að reisa skilti á völdum stöðum við tjörnina þar sem leiðbeiningarnar væru líka á útlensku fyrir ferðamennina.

Þannig myndu allir fá eitthvað fyrir sinn snúð, fuglavinir, fjöslkyldufólk og borgarstjórn.

Ef þetta nær hins vegar fram að ganga verður mikill sjónarsviptir af mávinum, enda hef hef oft séð spaugileg atvik honum tengd. Læt hér gossa eina sögu:

Eftir mikla djammnótt sumarið 2004 stend ég fyrir utan vöffluvagninn á Lækjartorgi og gæði mér á belgísku bakkelsi.

Sem ég stend þarna verður mér litið á mannkerti sem skjögrar fyrir utan Héraðsdóm, talsvert ölvaður. Sá er klæddur fínum teinóttum jakkafötum, með farsíma í einni hönd og hálfétinn Nonna-bita í hinni. Maðurinn er talsvert málglaður og Nonninn því vanræktur og orðinn gegnsósa af sósunni frægu.

Skyndilega hrynur hálfur Nonninn í jörðina. Helvítis djöfull segir maðurinn og heldur áfram að tala. Hann er varla genginn tvö skref frá slysstað þegar fljúgandi mávur nælir í risavaxinn bitann og hefur sig til lofts með fenginn.

En bitinn er slepjóttur og losnar úr gogg mávsins og hrynur beint niður á vinstri öxlina á manninum sem bölvar mávinum hressilega svo viðmælandinn skilur ekki neitt.

Spurning hvort þessi maður hafi einhverja kontakta í ráðhúsinu?

P.S. Endilega kommentið, ég er gífurlega fáfróður um lífríki Reykjavíkurtjarnar þó ég þykist vel að mér í ýmsu.

Dead Line Walking

2006-06-22T14:54:00.000-07:00

Nú eru 13 klst. í að ég eigi að skila inn uppkasti númer tvö af handritinu og ég á enn eftir að slá 30 bls. inn á tölvugarminn.

Sem er samt fínt, í það minnsta er ég búinn að ákveða hvað ég ætla að skrifa. Mikill munur að þurfa ekki að gera það jafnóðum.

"The hardest thing about writing is knowing what to write."

Ójá! Þokkalega!

UPPFÆRT: Þetta er nú meira bullið!

(Myndin er sviðsett)

Hef það ennþá...

2006-06-22T11:33:00.000-07:00

Skeggleysi var lengi vandamál hjá mér, á meðan Arnaldur vinur minn gat valsað inn í ÁTVR að vild 16 ára gamall átti ég ennþá erfitt með að komast á bannaðar kvikmyndir í Sam-bíóunum, en í seinni tíð hefur þetta verið að spretta hægt og rólega.

Fór hins vegar út í búð áðan að kaupa tvo flöskubjóra og var spurður um skilríki. Þetta er skemmtileg tímasetning þarsem ég hef ekki rakað mig í meira en viku og er því eins fúlskeggjaður og ég get orðið.

Afgreiðslumaðurinn rak upp stór augu þegar hann sá að ég væri fæddur 1981, sagði að ég liti í mesta lagi út fyrir að vera fæddur 1989!

Ég verð 25 ára í ár og spurningin er hvort maður eigi ekki bara að kætast, þetta sé vísbending um að maður muni eldast vel og verða það sem kallst "silfur-refur," eins og Georg Klúní og fleiri góðir menn?

Dramatík

2006-06-20T12:04:00.000-07:00

Nú var að hefjast HM barátta milli Englands og Svíþjóðar og Michael Owen var að meiðast eftir eina mínútu.

England hefur ekki unnið Svíþjóð síðan 1968 og er ekki laust við að ég sé á báðum áttum með hvoru liðinu á á að halda. Báðar þjóðir eru mér kærar, ég bjó í Englandi sem barn og núna í vetur og er alinn upp af fólki sem lagði grunninn að sinni uppeldistækni í Svíþjóð.

Hvað á ég til bragðs að taka?

UPPFÆRT: 2-2. England átti samúð mína en Svíþjóð voru betri, gamla grýlan! Joe Cole bestur hjá Englandi.

Listi yfir hluti sem ég hélt að væru þýskir en reyndust svo vera franskir

2006-06-20T08:21:00.000-07:00

1. Kronenbourg
2. Arsene Wenger

Bitið fast í rykið

2006-06-16T18:02:00.000-07:00

Fór með pabba og Halldóri áðan á söngleikinn "We will rock you" sem spunninn er í kringum lög hljómsveitarinnar Queen. Er skemmst frá því að segja að hér er á ferðinni einhver sú allra versta hrákasmíð sem ég hef nokkru sinni séð.

Eins og tíðkast í svona uppfærslum er spunninn söguþráður sem leiðir til ákveðinna laga. Sögusvið söngleiks er margstolið og þreytt. Árið er tvöþúsúndþrjúhundruðogeitthvað og það er búið að banna rokktónlist (Fahrenheit 451). Stórt og sálarlaust fyrirtæki er rekið af hryllilegri konu sem kallast Mom (stolið beint úr Futurrama!) og fylgist fyrirtækið með hvað fólk er að gera og bælir niður sjálfstæða hugsun (1984) og svo búa uppreisnarmenn neðanjarðar (ótal, ÓTAL myndir og bækur) og beðið er eftir einhverskonar "leiðtoga."

Sá er ljóshærður vælukjói og með í för er leiðinlegasta stelpa í heimi sem á að vera einhverskonar grín sædkikk og gaf ég henni nafnið "comic burden." Upphefst svo leiðinleg og framvindulaus saga sem endar í anti-klímaxi, troðfull af vondu "karlar eru frá Mars, konur frá Venus"-gríni.

Lagavalið var misheppnað og mörg bestu lögin ekki spiluð. Við feðgar vorum viti okkar fjær af leiðindum allan tímann og sammála um að verri óður til góðrar hljómsveitar væri vandfundinn.

Ben Elton, sem eitt sinn hafði nafnbótina meistari í mínum húsum hefur verið lækkaður í tign og má núna bara kalla sig "the former genius formerly known as Ben Elton."

Svo er rokk bara ekkert jafn merkilegt og þetta fólk heldur. Ég meina, ég ELSKA rokk, en þetta er bara tónlistarstefna. Allur söngleikurinn gengur út á að rokk sé mótvægi við auðvaldið og valdasamteypur. Gott og vel.

En hvernig er þá hægt að útskýra stríðsglaða Bush-elskandi menn eins og Ted Nugent? Eða plötuútgáfuveldi Metallicu? Hvað með sjálfa Bítlanna sem í dag eru einungis til sem svakalegt lögfræðibatterí sem fer reglulega í mál við Apple Computers og græðir milljarða?

Eða þá hljómsveitina Queen+ sem samanstendur af Brian May, Roger Taylor og sessíon-hórum og er að fara á tónleikaferðalag?

Rokk er tónlist. Heilindi koma málinu ekkert við.

Mútur á HM?

2006-06-13T20:41:00.000-07:00

Ég hélt í alvörunni að það væri tilfellið fyrst þegar ég rak augun í þessa fyrirsögn á mbl.is

Fór strax að hugsa eitthvað á þessa leið: nú ef það er svona fjandi gott bakkelsið í Brasilíu, hvers vegna vinnur danskurinn ekki oftar?

Sló mér svo á lær. Ekki er nú öll vitleysan eins! Heyr á endemi. Jájá, frændi minn.

Meistari Grétar Amazeen heimsótti mig á dögunum og útskýrði fyrir mér reglurnar á meðan við horfðum á England-Paragvæ. Þar eð ég er frekar illa að mér í boltanum var einungis tímaspursmál hvenær frasi myndi fæðast:

,,Hausskot? Má það?"

Þetta var fært til bókar samstundis og er Grétar meðhöfundur.

Pub Quiz

2006-06-13T10:11:00.001-07:00

Fór á pöbb-kviss með félögum mínum Adam Dewar og Guy Lodge. Keppnin var mjög spennandi en talsverðs ósamræmis gætti hvað fjölda keppenda í hverju liði varðaði. Við vorum þrír og í 4. sæti með 95 stig en sigurliðið taldi 10 manns og vann það með 103 stigum. Hvað sem því leið þá vorum við svakalega ánægðir með verðlaunin, 10 sterling, og stefnum á að leggja þau í sjóð og ávaxta.

Guy er suður-afrískur og sagði mér frá vinsælasta kvikmyndaleikstjóra heimalands síns; Leon Schuster. Sá er einhverskonar grínisti sem tók við keflinu frá Jaimie heitnum Uys sem íslendingar minnast með hlýhug fyrir myndir sínar "The Gods must be crazy" og földumyndavélamyndina "Funny People 2" þar sem velstætt hvítt efristéttarfólk gerði at í fátækum blökkumönnum. Báðar myndinar hafa alltaf verið mjög umdeildar, ekki síst eftir að aðskilnaðarstefnan leið undir lok.

Schuster á vinsælustu mynd allra tíma í Suður-Afríku og heitir hún: "There is a Zulu on my Stoep" (ísl. ,,það er Súlú-maður á veröndinni minni." Er það einskonar blanda af leikinni grínmynd og falinni myndavél sem ekki einu sinni "Titanic" tókst að slá út. Meðal annarra ,,meistaraverka" Schusters má nefna; "Panic Mechanic", "You must be joking!" og "You must be joking too!"

Þó Guy hafi borið myndum Schusters illa söguna þá langar mig engu að síður mikið til að sjá þær, ef ekki bara fyrir þær sakir að mig svíður enn eftir að Leo og Kate mörðu aðsóknarmet "Með allt á hreinu" sem var fram til 1998 vinsælasta mynd allra tíma á Íslandi og tók á sínum tíma 117.000 manns í bíó, þar af 47.000 á landsbyggðinni. Við höfðum sérstöðu sem kvikmyndaþjóð fram að því.

UPPFÆRT: Ég hef ákveðið að reyna að slá í gegn í S-Afríku með því að gera svona földumyndavélamynd í anda Jamie Uys. Hún mun heita:

"Is that a Krugerand in your pocket, or are you just happy to see me?"

Skáldið í garðinum

2006-06-13T09:56:00.000-07:00

Í svona góðu veðri er erfitt að sitja fyrir framan tölvuskjá. Brá ég því á það ráð að skella mér í Regent's Park og skrifa þar upp á gamla móðinn, þ.e.a.s. með sjálfblekungi og pappírshefti. Þóttist ég vera ansi klár þar sem ég sat og lét mér detta í hug alls konar vitleysu fyrir handritið mitt. Nei, það er ekkert meira í þessari færslu. Hvað? Ég má alveg blogga um ekkert stundum. Ókei, gleymum þessu.

Eyðufyllinga-pistillinn

2006-06-13T09:54:00.000-07:00

Eftir að hafa lesið pistla dag eftir dag í Fréttablaðinu í mörg ár, hef ég loksins fundið upp pistla-formúlu:

,,Sumir gera fátt annað en A. A hitt og A þetta. Aðrir segja að A sé bölvuð vitleysa og B sé málið. Sjálfur hef ég alltaf hallast að C því ég er svo yfirvegaður og tek ekki þátt í þessu rugli heldur halla mér sposkur aftur á bak, horfi yfir þjóðfélagið og hlæ með sjálfum mér."

Öllum þeim sem lenda í að þurfa að skrifa pistil um málefni líðandi stundar er velkomið að nota formúluna.

Ó fyrir aftan

2006-06-12T17:45:00.000-07:00

Ó- endingin er rosalega fyndið fyrirbæri, gerir allt miklu krúttlegra. Á mínu heimili hefur hún helst verið notuð á götuheiti hjá afa og ömmu, s.s. afi í Brekkó og amma á Tómó. Margrét vinkona mín kallar grjónagraut alltaf grjónó. Sjálfum finnst mér skemmtilegast að nota þetta um hluti sem eru alls ekki krúttlegir; skattframtaló, tvöfalt manndrápó, alþingó, lifrarbilunó og svo framvegis. Hvað finnst ykkur?

BBC klúðrar viðtali

2006-05-20T07:21:00.000-07:00

Snilld! BBC var með frétt um málaferlin sem Apple plötufyrirtæki Bítlanna höfðaði á hendur Apple tölvufyrirtækinu og áttu að vera með stutt viðtal við sérfræðing um internetið sem átti að svara nokkrum vel völdum spurningum um niðurhal á tónlist. Því miður tókst þeim að setja vitlausan viðmælanda í myndverið og spurðu leigubílstjóra sem átti að vera í öðru viðtali. Það skemmtilegasta við þetta er að gæinn svaraði bara helvíti vel fyrir sig! Myndband hér.

Respect

2006-05-19T20:20:00.000-07:00

Snáðinn í Belgíu

2006-05-19T18:18:00.000-07:00

Skrapp til Belgíu í einn dag. Pantaði mér far með Eurostar lestinni og þarsem krónan er í teilspinni og pundið alls ekki gefins brá ég á það ráð að panta ódýrasta far sem völ var á: klukkan 06:00. Planið var einfalt: detta í svefn um 23:00 kvöldið áður, ná svona 6 tímum, taka leigubíl út á Waterloo og taka svo 2 tíma í lestinni til að lenda ekki í svefnskuld með dráttarvöxtum. Að sjálfsögðu tókst mér að fara ekki í háttinn fyrr en um 02:00 og þegar ég gerði MVP-tékk (Miði, Vegabréf, Peningar) uppgötvaði ég mér til mikils hryllings að kortaveskið mitt var HORFIÐ. Eftir klukkutíma leit að því fann ég það límt í ofanverðri tromlunni á þvottavélinni eins og obláta sem festist á gómi. Lá í móki í klukkutíma áður en ég tók leigubíl skjálfandi og sveittur og náði svo að sofna smá í fósturstellingu í lestinni, slefandi á annað sætið. Kom inn í Brussel og fyrsti hraðbankinn sem ég prófaði svaraði mér með skætingi á flæmsku. Ég var sannfærður að kortið væri ónýtt, þvegið á of háum hita. Eftir 45 mínútna labb um annars fallega borg fann ég loks hraðbanka sem virkaði og skellti mér í kjölfarið að hitta Krulla frænda sem býr hér og starfar hjá eftirlitsstofnun EFTA. Mér var vel tekið þar á bæ, talaði smá norsku við samstarfsmenn Krulla og fékk meira að segja svona fínan passa sem ég gleymdi næstum að skila þegar við fórum út að borða í hádeginu.

Leiðin lá svo til Gent þarsem ég átti rondevú við Úlf og Apparat. Þetta voru miklir fagnaðarfundir og ekki laust við að menn yrðu klökkir því ég hef ekki verið "on the road" með þeim síðan 2001 í Danmörku, sælla minninga. Hörður Bragason, e.þ.s. Gason Bra, rifjaði upp gælunafn mitt innan hljómsveitarinnar en þeir kölluðu mig alltaf ,,snáðann" í den tid og var ég glaður að rifja þetta upp, enda hef ég sjaldnast þótt nógu merkilegur til að hafa gælunafn.

Eftir stutta hljóðprufu var haldið á hótel í 15 mín og svo farið á blaðamannafund sem var í skrýtnara lagi; kynnirinn stamaði, sneri bakinu í áhorfendur og spurði furðulegra spurninga. Ég brá á það ráð að koma með spurningu úr salnum, sem var reyndar plönuð fyrirfram eins og allar bestu spurningarnar, og vakti það nokkra kátínu.

Svo kom dansatriði sem stúlkur í belgískum danshóp höfðu samið við lagið Stereo Rock and Roll. Það minnti mig helst á atriði í undankeppni Skrekks, þær rugluðust pínu og voru lítt samhæfðar í fínhreyfingum. Engu að síður voða krúttlegt allt saman.

Nújæja, tónleikarnir voru vægast sagt flottir og eins bullandi hlutdrægur og ég nú er þá fannst mér þetta vera einn besti performans sem ég hef séð með bandinu. Salurinn tók líka vel í þetta eins og má sjá hér og þó þekktu fæstir lögin fyrir. Ég fann stað á miðju gólfinu þarsem fólk var farið að slamma og slóst með í hasarinn þangað til að svefnleysið fór að segja til sín og færði mig aftar í kaldara loftslag.

Stjarna þessarar ferðar var Páll Einarsson sem var á tökkunum þetta kvöldið og mixaði herlegheitin ofan í Belgana af stakri snilld. En fyrir utan að útvega þetta fína sánd á tónleikunum þá fór hann á kostum hvað eftir annað með sögum og skrýtlum. Hápunktur ferðarinnar var í morgunmatnum daginn eftir þegar hann útskýrði fyrir okkur aðaláhugamál sitt: að veiða geitunga og hafa þá sem gæludýr.

Í stuttu máli var hann búinn að finna leið til að setja litla ól á hálsinn á geitungi þannig að maður gæti farið með hann út að ganga. Einnig var hann með miklar hugmyndir um að búa til geitungaknúna flugvél og gera englaspil sem væri knúið af geitungakrafti. Myndband má finna hér.

Þessu öllu ótengt: hér er myndband af flottum gaur sem spilar stundum á gítar á brúnni fyrir ofan Camden síkið. Helvíti svalur!

F.Y.R. Iceland

2006-05-19T17:55:00.000-07:00

Annars hefst þetta aldrei. Annars var gaman á Compton pöbbinum, allir með á nótunum og kynnirinn, sem hét Ebonie, spáði íslenska laginu áfram og var mjög svekkt/ur þegar það klikkaði og smellti því í spilarann og mæmaði allan textann.

Þessi síða er í "vinnslu"

2006-03-14T07:50:00.000-08:00

Kæru lesendur.

Nú á sér stað yfirhalning á síðu þessari. Unnið er að nýrri stefnu sem og ýmiskonar forvinnu. Síðan fer aftur í gang af krafti þann 8. apríl. Fylgist spennt með!